Бугарскиот министер за внатрешни работи најави обезбедување за Ива Михаилова доколку ѝ биде потребно

Бугарските власти ќе ги испитаат околностите под кои Ива Михаилова пристигнала во Бугарија, а доколку се утврди дека ѝ е потребно обезбедување, ќе ѝ биде доделена заштита. Ова го изјавил бугарскиот министер за внатрешни работи Иван Демерџиев, пренесува „Новини.бг“.

Михаилова се наоѓа во болницата „Пирогов“ во Софија, откако ја напушти Македонија, каде што против неа се води судска постапка за сообраќајна несреќа со смртни последици.

— реклама —

„Известен сум дека таа и нејзиниот адвокат се наоѓаат во ‘Пирогов’. Ќе се преземат чекори за нејзино сослушување и за утврдување кога, каде и како ја преминала границата“, изјавил Демерџиев, додавајќи дека ќе бидат испитани и другите околности во случајот, вклучително и потребата од обезбедување.

— реклама —

Во меѓувреме, Министерството за надворешни работи и надворешна трговија на Македонија реагираше на приемот на Михаилова во Софија, оценувајќи дека ваквото постапување на бугарските институции ја поткопува довербата меѓу двете држави и е спротивно на заложбите за добрососедски односи.

Од Министерството нагласуваат дека националната припадност и поседувањето друго државјанство не смеат да бидат заштита од судска одговорност. Најавија и дека за случајот ќе ги информираат меѓународните партнери, особено институциите на Европската Унија и Советот на Европа.

— реклама —

Случајот дополнително добива политичка димензија поради таткото на Ива Михаилова, Симеон Михаилов, кој се наоѓа во Бугарија и за кого, според објавените информации, во Македонија има правосилна затворска пресуда. Тој е осуден на 12,5 години затвор за обид за убиство на Драганчо Стоименов, познат како Дацо Белски, а МВР го бара со меѓународна потерница за издржување на казната.

— реклама —

Пред еден месец Михаилов се појавил на протест пред македонската амбасада во Софија, каде што во изјава за бугарската телевизија Б-ТВ ја нарекол Македонија „сурова земја“, критикувајќи ги ограничувањата за патување на неговата ќерка додека трае судскиот процес.

Премиерот Христијан Мицкоски претходно побара Бугарија да го екстрадира Михаилов. Сега, наместо да се врати во Македонија, Ива Михаилова се наоѓа во Бугарија, каде што надлежните институции треба да ги утврдат околностите на нејзиното пристигнување.