Царините и новите правила на ЕУ би можеле да ги поскапат електричните автомобили за илјадници евра

Европската автомобилска индустрија се соочува со сериозни предизвици, а ново истражување на независниот институт „Бројгел“ оценува дека дел од мерките на Европската Унија повеќе ги штитат традиционалните производители отколку што им помагаат да станат поконкурентни.

Во извештајот се наведуваат царините за кинеските електрични возила, плановите за задолжително користење компоненти произведени во ЕУ и промените поврзани со забраната за продажба на нови автомобили со мотори со внатрешно согорување. Според „Бројгел“, ваквите политики би можеле дополнително да ја зголемат цената на електричните автомобили.

— реклама —

Како пример се наведува производството на батериски ќелии во ЕУ. Доколку нивната цена се зголеми од 50 на 85 евра за киловат-час, просечниот електричен автомобил би можел да поскапи за околу 2.100 евра. Дополнителни 200 евра би можеле да произлезат од употребата на челик со ниски емисии на јаглерод.

Институтот оценува дека најголем товар би почувствувале купувачите на поевтини автомобили и домаќинствата со пониска куповна моќ. Според анализата, најевтиниот пат кон електрификацијата во моментов минува низ глобалните синџири на снабдување, додека домашното производство е поскапо.

— реклама —

Како пример се посочува Франција, каде што системот на субвенции практично ги ограничил кинеските производители. Продажбата на моделите што не ги исполнуваат условите за субвенции опаднала за 60 проценти во споредба со оние што ги исполнуваат условите.

„Бројгел“ предупредува и на последиците од честите промени на правилата, оценувајќи дека регулаторната непредвидливост дополнително ја намалува конкурентноста.

ЕУ во октомври 2024 година воведе царини до 35,3 проценти за кинеските електрични автомобили, но тие не се однесуваат на хибридните возила. Оттогаш увозот на целосно електрични автомобили се стабилизирал, додека увозот на хибриди значително пораснал.

— реклама —

Европската автомобилска индустрија, особено германската, истовремено се соочува со пад на производството. Според податоците на „Бројгел“, производството на автомобили во ЕУ од 2019 година е намалено за околу 2,6 милиони возила, односно за 19 проценти. Минатата година Европејците купиле 2,2 милиони нови автомобили помалку отколку во 2019 година.

Сепак, извештајот нагласува дека индустријата не е пред целосен колапс. Секторот и натаму вработува околу 14 милиони луѓе и останува значаен нето-извозник, додека компаниите продолжуваат да инвестираат во батерии и електрични возила.

— реклама —

„Бројгел“ предлага ЕУ да ги изедначи царините за целосно електричните и хибридните возила и да преговара со Кина за временски ограничени квоти за извоз. Институтот исто така смета дека странските инвестиции, вклучително и кинеските, треба да се гледаат како можност за развој, наместо автоматски да се ограничуваат.

Според заклучокот на извештајот, на европската автомобилска индустрија ѝ е потребна стратегија за приспособување кон промените, наместо долгорочна заштита од конкуренцијата.