СДСМ преку соопштение обвини дека државата се соочува со сериозна криза поврзана со безбедноста на водата за пиење, оценувајќи дека Владата предводена од ВМРО-ДПМНЕ не презема соодветни мерки и не утврдува одговорност.
Од партијата посочуваат дека проблеми со водоснабдувањето и безбедноста на водата се евидентирани во повеќе населени места, меѓу кои Гостивар, Крушево, Валандово, Булачани, Пласница, Лешок, Преглово, Маврово, Рич, Белотино, Башино Село, Елшани, Велестово, Сушица, Зубово, Дражево, Борисово, Колешино и Ново Коњарево.
Во соопштението се наведува дека дополнителна загриженост предизвикуваат и, како што тврдат од СДСМ, загадувањата на реките Лепенец и Вардар, особено поради нивната близина до бунарите што го дополнуваат изворот Рашче.
Од опозициската партија велат дека граѓаните се соочуваат со небезбедна вода за пиење, потсетувајќи и на состојбата во Гостивар, каде што е регистрирана епидемија.
СДСМ обвинува дека и покрај, како што наведуваат, сериозноста на состојбата, сè уште не е утврдена одговорност и ја обвинува Владата дека во изминатите две години не воспоставила ефикасен систем за справување со вакви кризни ситуации. Од партијата оценуваат дека станува збор за системски пропусти кои, според нив, ги загрозуваат здравјето и безбедноста на граѓаните.
