Борбата со пожарот во селото Раец продолжува и во текот на ноќта, а сите расположливи сили остануваат на терен во обид да се локализира огнената линија и да се спречи нејзиното понатамошно ширење, соопшти градоначалникот на Кавадарци, Митко Јанчев.
Тој информира дека во акцијата се вклучени екипи на ЈП „Комуналец“, Територијалните противпожарни единици од Кавадарци и Неготино, Дирекцијата за заштита и спасување, механизација, како и жители од околните населени места. Како превентивна мерка, во селото Дреново е стационирано и амбулантно возило со лекар.
Според Јанчев, активностите ќе продолжат непрекинато до раните утрински часови, кога се очекува во гаснењето повторно да се вклучи и воздушна поддршка.
Тој упати благодарност до пожарникарите, институциите, доброволците и граѓаните кои, како што истакна, несебично се борат со огнената стихија и вложуваат максимални напори за заштита на луѓето и имотот.
