Цените на нафтата денеска останаа речиси непроменети на меѓународните пазари, задржувајќи се близу 85 долари за барел, додека инвеститорите внимателно ги следат случувањата поврзани со тензиите меѓу САД и Иран.
На лондонскиот пазар барелот на нафта се тргуваше по цена од 85,05 долари, додека на американскиот пазар изнесуваше 79,66 долари.
Во фокусот на пазарите останува Ормускиот теснец, поради стравувањата дека ескалацијата на конфликтот би можела да го наруши транспортот на енергенси.
Според договорениот американско-ирански преговарачки рамковен документ, Иран го задржува управувањето со Ормускиот теснец, но Техеран повторно предупреди дека бродовите мора да го користат безбедниот коридор долж иранскиот брег.
Во изминатите денови иранските сили неколкупати нападнаа бродови со беспилотни летала и проектили, а САД возвратија со напади врз цели во јужен Иран. По тоа, Техеран го запре поморскиот сообраќај низ Ормускиот теснец, додека Вашингтон повторно воведе поморска блокада на иранските пристаништа и ја повлече дозволата за извоз на иранска нафта.
И покрај тензиите, пазарите делумно ги смири информацијата дека Иран ослободил американска државјанка која била задржана во земјата од 2024 година. Американскиот претседател Доналд Трамп овој потег го оцени како „гест на добра волја“, што, според аналитичарите, може да биде сигнал за намалување на ризикот од поширок воен конфликт.
