Цените на нафтата паднаа по шпекулациите за отворање на Ормутскиот теснец

Новите геополитички тензии и неизвесноста околу состојбата на Блискиот Исток повторно силно влијаат врз светските нафтени пазари, при што цената на нафтата вчера се намали по шпекулациите дека би можело да дојде до отворање на Ормутскиот теснец.

— реклама —

На лондонскиот пазар цената на барелот во попладневните часови се намалила за 3,42 долари и изнесувала 96,16 долари. На американскиот пазар барелот поевтинил за 3,74 долари и се тргувал по цена од 90,15 долари.

Пазарите внимателно ги следат сигналите од Соединетите Американски Држави и Иран околу можноста за отворање на Ормутскиот теснец, низ кој поминува значителен дел од светската трговија со нафта.

— реклама —

На почетокот на неделата трговците проценувале дека Вашингтон и Техеран би можеле да се приближат до рамка за мировен договор, што би создало услови за отворање на теснецот. Но ситуацијата повторно се влошила по новите американски напади врз ирански цели.

— реклама —

Американската војска соопштила дека повторно нападнала ирански поморски бродови во Персискиот Залив и ракетни инсталации во јужен Иран, наведувајќи дека акцијата била насочена кон заштита на американските сили од закани.

Од друга страна, Техеран оценил дека нападите претставуваат прекршување на прекинот на огнот, а иранската војска порача дека го задржува правото на одговор.

— реклама —

Поради муслимански празник, Организацијата на земјите извознички на нафта не ја објави цената на кошничката сурова нафта на своите членки за вторник. На почетокот на неделата цената изнесувала 107,37 долари за барел, што било намалување од пет долари во споредба со петокот.