СДСМ преку соопштение денеска ја обвини Владата предводена од Христијан Мицкоски дека не презема доволно мерки за заштита на животниот стандард на граѓаните, оценувајќи дека високите цени и стагнацијата на приходите создаваат сè поголем притисок врз семејните буџети.
Од партијата велат дека цените на производите со месеци се високи, додека трошоците за живот растат, а приходите на граѓаните не го следат тој тренд.
Според СДСМ, потрошувачката кошничка со вклучена кирија достигнала речиси 90.000 денари, додека просечната плата се намалила за 1.163 денари.
Од опозициската партија ја обвинуваат Владата за, како што велат, погрешни економски политики и недоволна заштита на стандардот.
СДСМ посочува и на растот на цените на горивата, при што дизелот надминал 100 денари за литар. Од партијата велат дека Владата не ги намалила акцизите, ниту ДДВ-то за горивата од 18 на 5 отсто.
Во соопштението се критикува и политиката во однос на платите и пензиите, со оценка дека не е исполнето ветувањето за минимална плата од 600 евра.
Од СДСМ сметаат дека намалувањето на цените на училишниот прибор нема значително да го намали финансискиот товар врз семејствата.
„На родителите им се потребни поголеми плати за да можат децата да ги испратат во училиште, да им обезбедат храна, ужинка, облека и да ги покријат трошоците поврзани со образовниот процес“, наведуваат од СДСМ.
Партијата обвинува дека приоритет на Владата не се граѓаните, туку, како што тврдат, бизнис-интересите.
