„Ценовен удар и мигранти ниту имало ниту ќе има, тоа што има е дебакл на СДС како последниот во Брвеница“, велат од ВМРО-ДПМНЕ

ВМРО-ДПМНЕ преку соопштение ги отфрли обвинувањата на СДСМ за можни поскапувања и ангажирање голем број странски работници, обвинувајќи ја опозициската партија дека шири страв и паника меѓу граѓаните.

— реклама —

Во реакција на прес-конференцијата на СДСМ, од владејачката партија наведуваат дека не се оствариле црните сценарија за кои, според нив, предупредувала опозицијата, меѓу кои банкрот на државата, зголемување на јавниот долг и инфлацијата, доаѓање мигранти и недостиг на вода поради изградба на центри за податоци.

Од ВМРО-ДПМНЕ тврдат дека состојбите во економијата се подобруваат и посочуваат дека инфлацијата во септември изнесувала 2,7 отсто, додека нафтените деривати биле најевтини во регионот. Во соопштението се наведува и дека, според податоците на Евростат, Македонија имала најниска просечна годишна стапка на инфлација во регионот во третиот квартал од 2026 година, која изнесувала 2,5 отсто.

— реклама —

Партијата упати критики и кон поранешната министерка за труд и социјална политика Јованка Тренчевска, која настапува во име на СДСМ, обвинувајќи ја дека за време на нејзиниот мандат не биле обезбедени соодветни услови за пензионерите и работниците. Од ВМРО-ДПМНЕ посочуваат дека методологиите за пресметување на платите и пензиите биле донесени во периодот кога СДСМ беше на власт.

— реклама —

Во однос на странските работници, од партијата велат дека нивното ангажирање преку работни дозволи е практика што постои и во други европски земји, кои се соочуваат со недостиг на работна сила. Според ВМРО-ДПМНЕ, бројот на странски работници треба да се разгледува во согласност со потребите на пазарот на трудот.

Од владејачката партија оценуваат дека СДСМ, предводена од Венко Филипче, нема конкретни решенија и дека со најавите за ценовен удар и мигранти се обидува да го прикрие сопствениот политички неуспех.

„Ценовен удар ниту имало ниту ќе има, мигранти ниту имало ниту ќе има“, наведуваат од ВМРО-ДПМНЕ во соопштението.