Четири лица се здобиле со тешки телесни повреди, а уште две се повредени во сообраќајна несреќа што рано утринава се случила на магистралниот пат Скопје – Граничен премин Долно Блаце.
Како што соопшти Министерството за внатрешни работи, несреќата била пријавена околу 1:40 часот, кога се судриле патничко возило „Киа“, управувано од 33-годишниот К.Ц. од Косово, и патничко возило „Фолксваген голф“, управувано од 61-годишниот С.Ј., исто така од Косово. Двете возила биле со косовски регистарски ознаки.
Во судирот тешко се повредени двајцата возачи, како и сопатничките во „Фолксваген голф“, С.Ј. (54) и Е.Ј. (20). Со телесни повреди се здобиле и сопатниците Б.Х. (23) и Б.И. (35), сите од Косово. Повредените биле пренесени во Градската општа болница „8 Септември“ и во Ургентниот центар при Комплексот клиники „Мајка Тереза“ во Скопје, каде што им била укажана лекарска помош.
По наредба на јавен обвинител, возачот на „Киа“, К.Ц., ќе биде лишен од слобода по неговото отпуштање од болничко лекување.
На местото на несреќата увид извршила увидна екипа на СВР Скопје.
