Четворица убиени по комеморација во Јужна Африка, меѓу ранетите и дете

Четири лица го загубиле животот, а уште три биле ранети во вооружен напад врз група луѓе кои се враќале од комеморација за локална политичка лидерка во населбата Катлехон, југоисточно од Јоханесбург, соопшти полицијата во Јужна Африка.

— реклама —

Пукањето се случило доцна синоќа, а меѓу повредените има и дете. Според првичните информации од полицијата, на местото на нападот загинале двајца мажи, но бројот на жртвите денеска се зголемил на четири, откако уште две лица им подлегнале на повредите во болница.

— реклама —

Осомничениот напаѓач е во притвор, откако самиот ѝ се предал на полицијата, пренесува Асошиејтед прес. Истрагата ја води посебен тим на Полициската служба на Јужна Африка, задолжен за случаи на убиства со политички мотиви.

Според извештаите на локалните медиуми, дел од жртвите биле членови на младинскиот огранок на Африканскиот национален конгрес (АНК), најголемата партија во парламентот на Јужна Африка.

— реклама —

Комеморацијата била посветена на локална лидерка на АНК, која претходно овој месец била убиена во напад за кој постои сомневање дека имал политичка заднина. Полицијата засега не го потврдила идентитетот на жртвите, наведувајќи само дека тие присуствувале на комеморација за „член на политичка партија“.

Јужна Африка бележи висока стапка на криминал со употреба на огнено оружје, вклучително и престрелки поврзани со локални политички ривалства.