(Видео) Насилни протести против имигрантите во Јужна Африка, запалени 24 автомобили

Насилни протести против имиграцијата избувнаа вчера во јужноафриканските градови Совето и Дурбан, каде што демонстрантите палеле автомобили и ограбувале продавници во сопственост на странски државјани. Немирите следуваат по одлуката на Уставниот суд, со која се олеснува поднесувањето барања за азил, пренесува „Еуроњуз“.

Според полициските податоци, во Совето, во близина на канцеларијата на Министерството за внатрешни работи во населбата Орландо Вест, биле запалени десет автомобили. Биле ограбени и повеќе продавници чии сопственици се странски државјани. Пожарникарите интервенирале за да ги изгаснат пожарите, додека полицијата ги блокирала околните улици.

— реклама —

Слична била состојбата и во Дурбан, каде што била испратена интервентна полиција по пријави за грабежи и подметнување пожари. Во градот изгореле 14 автомобили.

— реклама —

Повод за протестите е пресудата што Уставниот суд ја донел во јули, со која се отстрануваат пречките за поднесување барања за азил. Одлуката се однесува и на мигрантите кои нелегално влегле во земјата. Властите соопштиле дека канцелариите за прием на бегалци се преоптоварени со барања.

— реклама —

Владата најавила зголемување на капацитетите за обработка на податоците и засилени проверки на идентитетот. Истовремено, нагласила дека судската одлука не значи дека барателите автоматски ќе добијат статус на бегалци.

Полицијата потврдила дека во Совето нема повредени лица и најавила кривично гонење на сите што учествувале во насилството и уништувањето имот.