Околу 200 лица, меѓу нив и деца, пронајдени затворени во нелегален центар во Јужна Африка

Околу 200 лица, меѓу кои и малолетници, биле пронајдени во нехумани услови во објект во провинцијата Мпумаланга, на североистокот на Јужна Африка, за кој постои сомневање дека работел како нелегален центар за одвикнување од зависности. Дел од затекнатите лица биле врзани со синџири.

Пастор кој управувал со установата и неговата сопруга се уапсени под сомнение за киднапирање, пренесува Би-би-си. Центарот, со кој управувала црквата, бил откриен во четвртокот за време на полициска операција.

— реклама —

Надлежните соопштиле дека затекнале пренатрупани простории, лица со рани по телото и пациенти кои биле врзани едни за други. Во исти простории со возрасните биле сместени и 16-годишно девојче и 11-годишно момче.

Иако брачниот пар тврдел дека во центарот има 60 лица, при проверката биле откриени повеќе од трипати поголем број луѓе, меѓу кои и над 30 жени. Според надлежните, повеќето од нив најверојатно биле зависници од дрога.

— реклама —

Затекнатите лица немале пристап до исправни тоалети ниту до проточна вода, а некои престојувале во установата подолг период.

Поранешен корисник на центарот, Гифт Скосана, за локалната телевизија „Њузрум Африка“ изјавил дека врзувањето со синџири било вообичаена практика и при приемот и како казна. Сепак, тој навел дека престојот во установата му помогнал да се ослободи од зависноста. Друго лице изјавило дека по искуството во центарот му е потребна психолошка помош.

— реклама —

Брачниот пар наплаќал околу 160 евра месечно за сместување на едно лице, а речиси половина од сумата одела во црквата.

Полицијата соопштила дека 14 лица биле пренесени во болница за понатамошно лекување, додека 132 биле повторно споени со своите семејства.

Против уапсените се поднесени обвиненија за киднапирање, а можно е да следуваат и дополнителни обвиненија. Се очекува тие да се појават пред локалниот суд во понеделник.

Нелегалните центри за рехабилитација стануваат сè почеста појава во Јужна Африка, каде што расте употребата на дрога. Министерството за социјален развој минатата година соопштило дека низ земјата открило повеќе од 100 незаконски установи, главно во провинцијата Гаутенг, каде што се наоѓа Јоханесбург.