Во еден од најголемите украински напади со беспилотни летала од почетокот на војната, Москва и околината беа цел на масовен воздушен удар, по кој избувнаа пожари во нафтна рафинерија, а делови од руската престолнина беа прекриени со црни наслаги што жителите ги опишуваат како „црн дожд“.
Според локалните власти, во нападот биле повредени 17 лица во Московската област. Густ чад се издигнал од погодената рафинерија „Капотња“, која, според извештаите, била погодена по третпат во последниот месец.
Жители од југоисточниот дел на Московската област изјавиле дека ситен дожд оставал темни дамки на облеката и возилата. Иако градските власти негираа дека станува збор за „нафтен дожд“, преку официјалните канали беше препорачано на граѓаните да ги држат прозорците затворени, а на семејствата со деца, постарите лица и лицата со респираторни заболувања им беше советувано привремено да го напуштат подрачјето.
Руското Министерство за одбрана соопшти дека во последните 24 часа биле пресретнати и уништени речиси 1.000 украински дронови и четири крстосувачки ракети. Во меѓувреме, во Ростовската област бил погоден нафтен склад, при што загинало едно лице.
Украинскиот претседател Володимир Зеленски изјави дека нападот претставува одговор на неодамнешните руски удари врз Киев. „Не ја сакаме оваа војна и никогаш не сме ја сакале. Но, ако гори Украина, ќе гори и Москва“, порача Зеленски.
Како одговор, рускиот министер за надворешни работи Сергеј Лавров најави дека руските напади врз Украина ќе продолжат со засилен интензитет.
Поради нападите, привремено беа затворени четирите главни московски аеродроми, а стотици летови беа откажани или одложени. На социјалните мрежи се појавија бројни снимки од експлозии, пожари и дронови над руската престолнина.
Нападите врз Москва стануваат сè почести во последните години, откако Украина значително ги зголеми своите способности за далекудометни удари со беспилотни летала. Според Киев, целта е војната да ја почувствуваат и граѓаните во Русија, додека Москва тврди дека успешно го одбива најголемиот дел од нападите.
