ЦРТА: Неправилности на 29 отсто од избирачките места во Србија

На парламентарните избори во Србија до 16 часот гласале 56,4 отсто од избирачите, соопшти набљудувачката мисија ЦРТА. Нејзините набљудувачи забележале неправилности на 29 отсто од избирачките места, кои се однесуваат на притисоци врз гласачите, членовите на избирачките одбори и набљудувачите.

— реклама —

Според ЦРТА, на 18 отсто од избирачките места биле забележани пропусти во постапката, додека на 17 отсто биле утврдени неправилности што го загрозуваат интегритетот на гласањето.

— реклама —

Меѓу најчестите неправилности се фотографирањето на гласачките ливчиња, забележано на 40 отсто од избирачките места, како и непочитувањето на обврската за употреба на УВ ламба, утврдено на 21 отсто од местата. Гласање без важечки документи било забележано на шест отсто од избирачките места.

Од ЦРТА предупредуваат дека и помалите неправилности можат да имаат значително влијание доколку изборниот резултат биде тесен.

— реклама —

Набљудувачката мисија пријавила и инциденти поврзани со нејзините набљудувачи. Меѓу нив се заплашување на набљудувачка во Земун и случај во Крагуевац, каде што непознато лице лажно се претставило како член на правниот тим на организацијата.

ЦРТА повторно ги повика политичките чинители и граѓаните да придонесат за смирување на тензиите и да се воздржат од каков било облик на насилство.