Претседателските избори во Србија мора да бидат распишани до 27 декември

Србија најдоцна до 27 декември треба да ги распише претседателските избори, соопшти вршителката на должноста претседателка на државата, Ана Брнабиќ, повикувајќи се на уставните рокови. Таа најави дека функцијата вршител на должноста претседател може да му биде доверена на друго лице доколку институциите бидат формирани пред истекот на рокот.

— реклама —

На прес-конференција во Белград, Брнабиќ порача дека новата власт треба што поскоро да ги воспостави институциите и да ја преземе одговорноста за управувањето со земјата. Според неа, оние што победиле на изборите мора да одговараат за состојбите во државата и да ги почитуваат Уставот и законите.

— реклама —

Таа нагласи дека новата власт има право да ги разрешува функционерите што не ги смета за соодветни, но тоа треба да го прави преку законски утврдени постапки.

Како примери за, според неа, притисоци и недозволиво однесување кон граѓаните, Брнабиќ ги наведе упадот во телевизијата „Информер“, наводниот напад врз телевизијата „Пинк“, приведувањето на директорот на гимназијата „Јовина“, Радивој П. Стојковиќ, упадот во претпријатието „Србијаводе“, спречувањето на партиските прослави во Горњи Милановац и Врбас, како и притисоците врз поединци да поднесат оставки.

— реклама —

Иако упати повик до претставниците на „Студентската листа“ да преземат одговорност, Брнабиќ не се осврна на обврската што ја има како вршителка на должноста претседателка да ја свика конститутивната седница на новиот парламент. Согласно со законските рокови, таа треба да биде свикана во рок од 30 дена од објавувањето на конечните изборни резултати од Републичката изборна комисија.

Во меѓувреме, на 1 ноември во Србија ќе се повторат парламентарните избори на 53 избирачки места.