Конечни резултати од изборите во Србија: Студентската листа со 140, СНС со 103 мандати

Републичката изборна комисија (РИК) на Србија синоќа ги објави конечните резултати од предвремените парламентарни избори одржани на 25 октомври, со што официјално започнаа роковите за формирање на новата влада.

Според конечните податоци, Студентската листа освоила 53,015 отсто од гласовите и 140 пратенички мандати, додека листата на владејачката Српска напредна партија (СНС), предводена од доскорешниот претседател Александар Вучиќ, добила 38,98 отсто од гласовите и 103 мандати. Разликата меѓу двете листи изнесува 623.094 гласа.

— реклама —

Од вкупно 6.451.292 запишани избирачи, на гласањето излегле 4.444.310 граѓани, односно 68,89 отсто. Гласањето се одржало на 8.392 избирачки места во Србија и во странство.

— реклама —

Покрај двете најголеми листи, седум мандати освоија претставници на националните малцинства. Алијансата на војводинските Унгарци и Албанската коалиција добија по два мандата, додека по еден освоија листите на Расим Љајиќ, „СДА – Чувари на Санџак“ и „Усама Зукорлиќ – Движење за обединување“.

Пред повторното гласање на 53 избирачки места, Студентската листа имаше 141 мандат. Но, по повтореното гласање, листата на Движењето за обединување освои еден мандат, со што бројот на мандати на студентското движење се намали на 140.

— реклама —

Овој резултат беше оспорен на седницата на РИК од членот Иван Шебек, кој побара дополнителна проверка на гласањето. Тој посочи дека, доколку се утврдат неправилности на одредени избирачки места, Движењето за обединување треба да го врати мандатот на Студентската листа.

— реклама —

Со објавувањето на конечните резултати започнуваат законските рокови за формирање на институциите. Конститутивната седница на парламентот треба да се одржи во рок од 30 дена, а по неговото конституирање, пратениците ќе имаат уште 90 дена за избор на новата влада.

Во Србија претстојат и предвремени претседателски избори. По оставката на Вучиќ на 27 септември, изборите мора да бидат распишани и одржани во рок од три месеци од завршувањето на неговиот мандат, а најдоцна до 28 декември.