Ракометната репрезентација на Македонија обезбеди пласман на Светското првенство, откако и во реваншот убедливо ја совлада Словачка со 38-23 во Скопје.
Избраниците на селекторот Кирил Лазаров со вкупни 69-47 го потврдија местото на Мундијалот, што ќе биде десетто учество на Македонија на светските шампионати.
Македонските ракометари од самиот почеток го контролираа натпреварот во арената „Борис Трајковски“ и уште на полувремето имаа сигурна предност од 18-11.
Во второто полувреме разликата постојано растеше, а Македонија стигна и до највисоки +15 при резултат 36-21.
До крајот селекторот Кирил Лазаров им даде шанса за настап на сите ракометари.
Најефикасен во македонскиот состав беше капитенот Филип Кузмановски со 11 погодоци.
Мартин Велковски постигна шест гола без промашување, додека Милан Лазаревски натпреварот го заврши со пет гола.
