Пратеникот од СДСМ, Борче Цветков, на денешната седница за пратенички прашања оцени дека земјоделството се наоѓа во најлоша состојба во последните години и побара одговорност од Владата за, како што рече, катастрофалната состојба во секторот.
Во отсуство на министерот за земјоделство, шумарство и водостопанство, Цветков прашањето го упати до заменик-министерот Албрим Хоџа.
Тој обвини дека земјоделците, сточарите, тутунарите, лозарите, овоштарите и оризопроизводителите се соочуваат со ниски откупни цени, доцнење на субвенциите и високи производствени трошоци.
„Земјоделството никогаш не било во полоша состојба. Нема гранка каде што нема проблем – секаде хаос и неизвесност“, изјави Цветков.
Според него, Владата ги намалила субвенциите за земјоделците за 40 милиони евра, а дел од мерките воведиле построги критериуми поради кои, како што рече, многу мали земјоделци останале без право на субвенции.
Тој посебно реагираше на состојбата со тутунопроизводителите, тврдејќи дека субвенциите биле намалени од 100 на 80 денари за килограм, а исплатите доцнат.
„Покажавте дека ниту имате капацитет, ниту волја да го развивате земјоделството и да им помагате на земјоделците“, рече Цветков, прашувајќи кој ќе понесе одговорност за состојбите во секторот.
