ВМРО-ДПМНЕ преку соопштение реагира на утринското соопштение на СДСМ и Венко Филипче во врска со одморот на премиерот Христијан Мицкоски, обвинувајќи ја опозициската партија за политички напади и создавање поделби.
Од владејачката партија велат дека проблемот со водоснабдувањето во Гостивар ќе биде решен, притоа обвинувајќи го Филипче дека како поранешен министер за здравство не реагирал на, како што тврдат, претходни случаи со загадена вода.
Во реакцијата ВМРО-ДПМНЕ поставува и прашање до СДСМ каде се наоѓа Филипче на одмор, при што изнесува две можности, поврзувајќи ги со Зоран и Вице Заев.
„Чесно е СДС да каже каде е Венко Филипче на одмор? Под А – на јахтата на Зоран Заев во Егејското Море. Под Б – со Вице Заев во Бугарија“, наведуваат од ВМРО-ДПМНЕ.
Партијата дополнително упатува обвинувања за наводно извлекување пари од РЕК и нивно префрлање преку фирма, но за овие тврдења не наведува докази во соопштението.
ВМРО-ДПМНЕ оценува дека СДСМ наместо да се занимава со политички напади треба да даде одговори за сопственото работење во периодот кога бил на власт.
