Социјалдемократската младина на Македонија (СДММ) денеска на прес-конференција на Кристијан Дојчиновски побара Владата јавно да соопшти колку средства ќе бидат потрошени за концертот на францускиот диџеј и продуцент Дејвид Гета по повод Денот на независноста.
На прес-конференција, Кристијан Дојчиновски од СДММ обвини дека Владата не дава одговори за финансиските детали поврзани со организацијата на настанот.
„Граѓаните плаќаат, а Владата крие колку чини концертот на Дејвид Гета за независноста“, рече Дојчиновски.
Од СДММ побараа да бидат објавени сите детали околу договорот, начинот на избор на организаторот и изворот на финансирање.
Според партијата, настапот на Гета чини најмалку еден милион евра, без дополнителните трошоци за бина, озвучување, обезбедување и останати придружни активности.
Дојчиновски постави прашања и за улогата на Авалон Продукција во организацијата на државниот настан, како и за продажбата на билетите преку компанијата.
„Фирмите кои се занимаваат со ваков тип на настани веќе шпекулираат дека сумата што е договорена е над 3 милиони евра, а може да достигне и до 5 милиони евра“, изјави тој.
Од СДММ порачаа дека не се против концерти и прослави, туку против, како што наведоа, нетранспарентно трошење јавни пари и можни злоупотреби.
„Независноста на државата треба достоинствено да се одбележува, а не со сомнежи за криминал и матни договори“, истакна Дојчиновски.
