ВМРО-ДПМНЕ преку соопштение упати остри критики кон претседателот на СДСМ, Венко Филипче, обвинувајќи го дека продолжува да се залага за политики кои, според партијата, се спротивни на националните интереси на Македонија.
Од ВМРО-ДПМНЕ велат дека најголемите политички и национални отстапки се случиле во периодот кога СДСМ бил на власт, посочувајќи ги промената на името, знамето и уставните измени како одлуки што оставиле трајни последици врз државата.
Според владејачката партија, и покрај тоа што сега е во опозиција, СДСМ продолжува да испраќа пораки дека е подготвен за нови отстапки, особено во делот на уставните измени и односите со Бугарија.
„Филипче јавно истакнува дека би ги спровел уставните измени и со месеци се обидува да се доближи до бугарските позиции, при што ги релативизира прашањата поврзани со македонскиот идентитет, историја и јазик“, наведуваат од ВМРО-ДПМНЕ.
Од партијата оценуваат дека СДСМ ја користи европската перспектива како аргумент за политики кои, според нив, не се во согласност со националните интереси.
Во соопштението се посочува дека Владата води политика заснована на заштита на државните интереси и достоинството на Македонија, додека СДСМ, според ВМРО-ДПМНЕ, се залага за решенија без доволни гаранции за државата.
„Останува отворено прашањето зошто Венко Филипче толку упорно инсистира на уставни измени без јасни гаранции и зошто не отстапува од оваа политика“, наведуваат од ВМРО-ДПМНЕ.
Од партијата додаваат дека граѓаните заслужуваат одговори за мотивите зад ваквите политички ставови и потези.
