Данска на нозе: Илјадници студенти протестираат против кратењето на државната помош

Илјадници дански средношколци и студенти излегоа на улиците во Копенхаген за да протестираат против планот на Владата за намалување или укинување на државната финансиска помош за образование на младите чии родители имаат средни или високи приходи.

Парите заштедени со овие мерки, Владата планира да ги пренасочи за одбрана, пишува „Еуроњуз“.

Протестот го организираа десетина ученички и студентски здруженија. Демонстрантите тргнаа од плоштадот пред Градското собрание во Копенхаген кон парламентот, носејќи голем транспарент со пораката „Доста е“.

— реклама —

Под полициски надзор, младите извикуваа пароли како „Помалку помош, помалку образование“, „Прекршени ветувања“ и „Не ги лажете младите“.

Според достапните податоци, околу 40.000 ученици и студенти штрајкувале во 57 училишта низ Данска, додека на протестот учествувале меѓу 12.000 и 13.000 млади. Собирот поминал мирно.

Данските ученици и студенти така се приклучија на бранот протести на младите што во последните недели, почнувајќи од Франција, се прошири и во други европски земји.

— реклама —

Данска е позната по системот на државна финансиска помош за образование, кој им овозможува на учениците и студентите да добиваат парична поддршка без оглед на приходите на нивните родители.

„Во Данска добиваме државна финансиска помош за образование и многу сме горди на тоа“, изјави Оскар Тонсберг Хофман, претседател на Данското здружение на средношколци и еден од организаторите на протестот.

Тој предупреди дека би било погрешно да се наруши еден од најсилните образовни системи во светот.

— реклама —

Според предлогот за државниот буџет, данската влада на левиот центар сака да ја укине паричната помош за образование на учениците и студентите кои живеат со родители чии вкупни годишни приходи надминуваат 700.000 дански круни, односно околу 94.000 евра.

Помошта би била намалена и за младите чии родители годишно заработуваат меѓу 419.589 круни, односно околу 56.138 евра, и 700.000 круни, односно околу 94.000 евра.

Според проценките на данското Министерство за високо образование, предложените промени би значеле целосно укинување на финансиската помош за околу 14.000 ученици и студенти, додека уште приближно 8.000 млади би добивале помали износи.

— реклама —

Системот на државна помош постои од 1970 година и се смета за еден од темелите на данското образование, бидејќи им овозможува на младите да се школуваат без оглед на финансиските можности на нивните семејства.

Досега, право на оваа помош имаа сите ученици и студенти постари од 18 години.

Младите кои живеат со родителите во моментов добиваат 1.154 дански круни месечно, односно околу 154 евра. Оние кои живеат самостојно добиваат 7.426 круни, што изнесува приближно 993 евра месечно.