Голем хакерски напад: Украдени податоци на речиси девет милиони луѓе

Хакери го нападнале централниот регистар со список на лица и нивните адреси во Данска, со што бил овозможен пристап до податоците на 8,8 милиони луѓе, соопшти данското Министерство за дигитализација.

„Националната управа за регистрација (CPR) утврди дека неовластени лица незаконски добиле пристап до имињата, адресите и CPR-броевите (еквивалент на бројот на социјално осигурување) на околу 8,8 милиони регистрирани лица (живи, починати, лица кои се иселиле и други)“, се наведува во соопштението.

— реклама —

Истрагата е во тек, но во оваа фаза сторителите сè уште не се откриени, навел истиот извор. Пристапот до податоците бил овозможен преку легален пристап што го имала една данска компанија. Тој пристап во меѓувреме бил отповикан.

Управата во петокот била известена за „аномалија“ во системот CPR, која се случила „во текот на септември“.

— реклама —

„Ова е исклучително сериозен инцидент“, изјавила министерката Кристина Егелунд, се наведува во соопштението за јавноста.

— реклама —

„Заедно со сите релевантни институции, работиме на утврдување на целосниот обем на инцидентот“, додала таа.

По истекувањето на податоците, управата соопштила дека презела мерки за спречување слични инциденти во иднина.

— реклама —

Националниот регистар содржи податоци за 11 милиони луѓе. Освен лицата кои моментално живеат и престојуваат во Данска, во него има информации и за починати лица, како и за оние кои ја напуштиле земјата.

Лицата со заштитена адреса и име не биле опфатени со истекувањето на податоците, се додава.