Со традиционалниот прв академски час, околу 13.800 бруцоши на универзитетите и факултетите низ земјава денеска официјално го започнаа своето високо образование. Новата генерација студенти беше поздравена на свеченостите од државниот врв, ректорите и професорите.
На платото на Универзитетот „Св. Кирил и Методиј“ (УКИМ) во Скопје, каде што годинава се запиша нова генерација студенти на 23 факултети, на најдобро рангираните бруцоши симболично им беа врачени индексите.
Претседателката Гордана Сиљановска-Давкова им порача на студентите да не се фокусираат само на меморирање податоци, туку да го негуваат критичкиот ум и да се борат за своите права.
„Бунтувајте се, барајте ги вашите права и убедувајте ги професорите дека се тука заради вас. На овој свет му треба идеализам: право, правда и етика. Верувам дека доаѓа време на софократија — време на умот, а УКИМ треба да биде предводник во промените“, истакна Сиљановска-Давкова.
Таа посочи и дека во ерата на технолошки напредок, природната интелигенција мора да остане во основата на користењето на вештачката интелигенција.
Министерката за образование и наука Весна Јаневска ги повика бруцошите да бидат љубопитни и храбри во потрагата по знаење, како и да ги користат можностите за истражувања, научни проекти и меѓународни размени.
Добредојде и честитки за пристапувањето кон академската заедница упатија и ректорката на УКИМ, Биљана Ангелова, како и претседателката на УСС на УКИМ, Ангела Василевска.
На Универзитетот „Гоце Делчев“ во Штип, каде што на 12 факултети и три академии се запишаа околу 1.500 бруцоши, се обрати премиерот Христијан Мицкоски.
Тој им порача на младите да се борат за својата иднина во татковината.
„Вистинскиот живот е борбата што ве чека — за вашите семејства и за вашата родна земја. Каде и да одите, вратете се дома за заедно да се бориме за Македонија“, порача Мицкоски, повикувајќи ги професорите да бидат вистински педагози и личен пример за студентите.
На Универзитетот „Мајка Тереза“ во Скопје, новата академска година ја започнаа околу 1.000 студенти. Заменик-министерот за образование и наука Дритон Сулејмани им порача дека факултетот е простор за градење критичко размислување и општествени иницијативи.
„Не се предавајте пред предизвиците. Успехот не се гради само од победите, туку и од способноста повторно да се исправите по падовите“, истакна Сулејмани.
