Министерството за внатрешни работи информира дека денеска, поради верскиот празник Задушница, во Скопје е воведен посебен режим на сообраќај со цел безбедно и непречено движење на возилата.
Од Единицата за безбедност на патниот сообраќај при СВР Скопје соопштија дека од 06:00 часот сообраќајот кон градските гробишта „Бутел“ се одвива во една насока, односно кружно.
Возилата се движат по улицата „Бутелска“, потоа лево по улицата „Александар Урдаревски“, повторно лево по улицата „Боца Иванова“ и десно кон влезот на гробиштата „Бутел“.
За излез од гробиштата, сообраќајот се одвива десно по улицата „Боца Иванова“ до кружниот тек на улицата „Бутелска“, потоа лево по истата улица и десно по улицата „Кемал Сејфула“.
Посебен режим на сообраќај е воведен и кај гробиштата во Камник, Драчево и Ѓорче Петров.
Од МВР посочуваат дека, доколку има потреба, посебниот режим ќе важи и во сабота и недела, на 30 и 31 мај.
Министерството апелира до граѓаните да ги почитуваат наредбите и насоките на полициските службеници на сообраќајниците опфатени со изменетиот режим.
