Детали за нападот во училиштето во Ченто: Поранешен ученик го нападнал деветтоодделенецот, детето е во стабилна состојба

Градоначалникот на Гази Баба, Боби Стевковски, реагираше по инцидентот во ООУ „25 Мај“ во Ченто, каде 15-годишник со остар предмет повреди ученик од деветто одделение.

Тој посочи дека напаѓачот бил поранешен ученик во училиштето, кој минатата година го завршил образованието таму.

— реклама —

„Со жалење и сериозна вознемиреност ја примив информацијата за немилиот настан кој се случил во училиште во Ченто, каде што еден поранешен ученик кој минатата година го завршил своето образование во ова училиште, дошол и повредил ученик од девето одделение“, напиша Стевковски.

— реклама —

Според него, по разговор со семејството на повреденото дете, бил информиран дека ученикот е во добра здравствена состојба и се наоѓа на болничко лекување.

„Лицето кое го извршило нападот е обезбедено од страна на Министерството за внатрешни работи. Како градоначалник на општина Гази Баба изразувам најостра осуда на ваквиот чин. Насилството не може да се оправда со ништо“, додава Стевковски.

— реклама —

Тој посочи дека Општина Гази Баба е во постојана координација со надлежните институции кои преземаат мерки за целосно расчистување на случајот.

Претходно, МВР соопшти дека на 11.05.2026 во 14:50 часот, полициски службеници од СВР Скопје лишиле од слобода 15-годишник од Скопје, по пријава дека во основно училиште на подрачјето на Гази Баба со остар предмет нанел тешки телесни повреди на друг 15-годишен ученик.

Неофицијално, повреденото дете е оперирано и се наоѓа во болница.