СДСМ обвини дека детските игралишта во Општина Аеродром се во лоша состојба и претставуваат ризик за безбедноста на децата, барајќи итна реакција од локалните власти.
Според партијата, дел од игралиштата се руинирани, оштетени и неосветлени, а недоволното одржување и честите вандализми дополнително ја влошуваат состојбата. Како најкритична ја посочуваат состојбата во паркот „Нирнберг“ во Ново Лисиче, каде, како што наведуваат, реквизитите подолг период се нефункционални и небезбедни.
Од СДСМ велат дека нивната советничка група во Советот на општината во повеќе наврати укажувала на проблемот и барала реконструкција, но, според нив, реакцијата од општината или изостанува или е недоволна.
Во реакцијата јавно се поставува прашањето до градоначалникот Дејан Митески за тоа кога ќе се преземат конкретни мерки, при што се бара привремено затворање на небезбедните игралишта и итна санација на оштетените реквизити, како и подобрување на осветлувањето.
Од партијата нагласуваат дека безбедноста на децата треба да биде приоритет и апелираат за брза реконструкција и редовно одржување на сите детски игралишта во општината.
