СДСМ преку соопштение соопшти дека не го оспорува правото на дијаспората да гласа, туку, како што наведува партијата, се спротивставува на воведување електронско гласање без соодветни механизми за контрола.
Од партијата велат дека македонските државјани кои живеат во странство и сега го остваруваат своето избирачко право, а обвинија дека предлогот на власта отвора можност за, како што велат, сериозни изборни злоупотреби.
„Ако граѓаните во Македонија гласаат со проверка на лични документи, отпечаток од прст и потпис во избирачкиот список, тогаш зошто некој би гласал преку интернет без јасна проверка на идентитетот и без контрола?“, прашуваат од СДСМ.
Во реакцијата упатија и критики кон премиерот Христијан Мицкоски, оценувајќи дека јавноста се доведува во заблуда со тврдењата дека опозицијата е против гласањето на дијаспората.
Според СДСМ, вистинската цел на предложените измени е создавање изборен систем што, како што тврдат, може да овозможи манипулации со гласовите од дијаспората.
„Граѓаните гледаат што се случува. Не се наивни. Како што вели народната поговорка – кој лаже, тој краде“, се наведува во партиското соопштение.
