Движењето ЗНАМ најавува дека во септември ќе објави извештај за работата на своите функционери, со кој, како што порача лидерот Максим Димитриевски, ќе им покаже на граѓаните што е сработено во изминатите две години.
Во гостување во „Вести плус“ на Канал 5, Димитриевски истакна дека партијата ќе продолжи со директна комуникација со граѓаните и со теренски активности низ државата.
„Некаде од средината на септември до почетокот на октомври ќе објавиме комплетен извештај за работењето на сите наши партиски функционери во сите сегменти, во сите министерства, директорати и буквално секаде каде што делуваме“, рече Димитриевски.
Тој нагласи дека за ЗНАМ политиката треба да се оценува преку работата и резултатите, а не преку анкети и медиумски наративи.
Говорејќи за европските интеграции, Димитриевски повтори дека јазикот, културата, идентитетот и историскиот континуитет на македонскиот народ не треба да бидат предмет на политички пазарења. Во однос на уставните измени, тој повтори дека ЗНАМ го поддржува моделот со одложено дејство, односно нивната примена по полноправното членство на Македонија во Европската Унија.
Димитриевски порача дека Македонија треба да продолжи со разговорите со европските партнери, но да бара решение што нема да значи нови блокади и условувања.
Тој истакна и дека ЗНАМ во Владата ќе продолжи да биде „коректив одвнатре“, особено за прашањата поврзани со државните симболи, националниот идентитет и принципите на државноста.
Во пресрет на 35-годишнината од независноста, Димитриевски порача дека државата треба да се гради со чувство на припадност, одговорност и гордост, како и со еднакви права и одговорности за сите граѓани.
