Од роботска рехабилитација до нова фасада: ЗНАМ со двегодишен отчет за Клиниката на Мехмедовиќ

Движењето ЗНАМ – За наша Македонија објави отчет за работата на директорот на Универзитетската клиника за физикална медицина и рехабилитација, Злате Мехмедовиќ, наведувајќи дека во изминатите две години во Клиниката биле реализирани повеќе инвестиции во медицинска опрема, реконструкција и нови технологии.

Според отчетот, во нова медицинска и роботска опрема се инвестирани околу 700.000 евра, а обезбеден е и нов инвестициски циклус од дополнителни 450.000 евра за современа опрема и натамошен развој на роботскиот кабинет.

— реклама —

Од ЗНАМ наведуваат дека биле реконструирани амбулантите и повеќе кабинети, воведена е ехо-дијагностика, повторно е ставен во функција кабинетот за лимфна дренажа, а се развива и роботската рехабилитација за возрасни и деца.

Мехмедовиќ неодамна во интервју за МИА изјави дека инвестициите во медицинска опрема во периодот 2024 – 2025 година изнесувале приближно 700.000 евра. Тој тогаш посочи дека Клиниката располага со опрема за роботски асистирана рехабилитација, современа електротерапија, ултразвучна дијагностика и опрема за лимфна дренажа.

— реклама —

Во партискиот отчет се посочува и ангажманот на Клиниката во рехабилитацијата на повредените во трагедијата во Кочани, за кои, како што се наведува, бил организиран мултидисциплинарен пристап.

ЗНАМ соопшти и дека е решен долгогодишниот проблем со употребата на мазут во Клиниката.

— реклама —

Следната инвестиција, според отчетот, е целосна реконструкција и енергетска трансформација на Клиниката. За проектот е обезбеден грант од околу 1,5 милиони евра од Светска банка, а предвидени се енергетска санација, нова фасада, замена на прозорците и воведување топлотни пумпи.

Мехмедовиќ претходно изјави дека проектот вреден околу 1,5 милиони евра опфаќа фасада и изолација, покрив, прозорци и современ систем со топлотни пумпи. Според него, станува збор за најголемиот циклус на инфраструктурна и технолошка модернизација на Клиниката во последните 70 години.

— реклама —

„Не велиме дека сите проблеми се решени. Велиме дека проблемите се преземаат, се решаваат и зад резултатите се застанува со име и презиме“, порачаа од ЗНАМ.

Од партијата наведуваат дека отчетот е дел од нивната практика за отчетност на избраните и именуваните функционери и дека целта е програмата на ЗНАМ да се реализира преку институциите.