Движењето ЗНАМ – За Наша Македонија продолжува со серијата директни средби со граѓаните и презентацијата на отчетот за работата на своите избрани и именувани функционери во Владата и Собранието.
На панел-дискусија во Велес, претседателот на ЗНАМ, Максим Димитриевски, порача дека политиката, според него, треба да биде во функција на државата и интересите на граѓаните, а не борба за позиции.
„Не влеговме во Владата за фотелји. Влеговме затоа што веруваме дека Македонија може да биде подобро место за живеење и дека државата мора да се гради со работа, морал, одговорност и резултати“, истакна Димитриевски.
Тој нагласи дека отчетноста, како што рече, не треба да биде само политичка фраза, туку обврска на секој што ја добил довербата од граѓаните.
„Ние не се криеме зад партиски фрази и дневнополитички партиски соопштенија. Она што сме го направиле ќе го покажеме. Она што не сме го направиле ќе го кажеме. А она што останува пред нас ќе го завршиме. Македонија нема време за уште едни изгубени години“, порача лидерот на ЗНАМ.
Од партијата наведуваат дека отчетот е дел од серијата активности со кои пред граѓаните ги презентираат работата и резултатите на нивните функционери во изминатите две години.
На панел-дискусијата во Велес говореле и потпретседателот на ЗНАМ и пратеник Павле Арсоски, кој се осврнал на работата на Собранието и законските решенија, како и потпретседателот на партијата и министер за земјоделство, шумарство и водостопанство Борче Серафимовски, кој говорел за мерките и политиките во земјоделството и домашното производство на храна.
Димитриевски порача дека за функционерите на ЗНАМ во Владата претстои уште работа, додавајќи дека партијата ќе поддржува, како што наведува, сè што е добро за државата, но и ќе предлага сопствени решенија и ќе дејствува како коректив.
Од ЗНАМ посочуваат и дека нивните претставници ќе бидат отворени за критики, сугестии и мислења од граѓаните, со порака дека отчетот треба да биде достапен и отворен за јавна проверка и критика.
Мотото под кое се одвива отчетот е „Две години работа. Две години резултати. Една љубов – Македонија!“
