Димоски ги извади старите објави по претресите во ВЈО Битола: Со години поставувал прашања за работата на обвинителството

Поранешниот јавен обвинител, а сега адвокат Војо Димоски, по вечерашната акција во која се вршат претреси во домот и службените простории на виш јавен обвинител од Вишото јавно обвинителство Битола, објави дел од своите стари јавни реакции во кои со години поставувал прашања за работата, контролата и постапувањето на ова обвинителство.

„Пред нешто час медиумите јавија дека МВР и ОЈО ГОКК вечерва во координирана акција вршат претреси во дом и службени простории на виш јавен обвинител од Вишото јавно обвинителство Битола. Не коментирам ништо, само во прилог неколку од многуте мои објави на таа тема од годините наназад“, напиша Димоски.

Меѓу објавите што ги сподели е негова реакција од 20 јуни 2023 година, во која поставувал прашања за предметите поврзани со струшкиот градоначалник Рамиз Мерко.

Димоски тогаш прашувал дали за пријавите против Мерко биле оформувани предмети и дали дел од нив биле опструирани од раководни структури во Јавното обвинителство и Вишото јавно обвинителство Битола во корист на пријавениот. Станува збор за негови јавно изнесени сомнежи и прашања, а не за утврдени факти.

— реклама —

Два дена подоцна, на 22 јуни 2023 година, Димоски повторно реагирал за начинот на кој се вршела контролата врз струшкото обвинителство.

Тој тогаш тврдеше дека во записниците од контролите на ОЈО Струга не биле констатирани недостатоци во постапувањето по предметите против Мерко и бараше одговорност и од повисоките обвинителски инстанци.

„Зошто е тоа така треба да одговорат раководителите на Вишото во Битола, а особено претходната раководителка, како и координаторот за струшкото обвинителство во Вишото обвинителство во Битола“, напишал Димоски во 2023 година.

Во истата објава тој поставил и директно прашање до тогашниот државен јавен обвинител дали бил вршен притисок предмет против Мерко, кој се однесувал на продажба на општински имот, да биде испратен во Обвинителството за организиран криминал, каде што, според тврдењето на Димоски, потоа бил „ставен на мраз“.

— реклама —

Димоски и подоцна јавно ја критикувал работата на ВЈО Битола.

Во јуни 2025 година, како полномошник на оштетени лица, поднел кривична пријава против градежна компанија и нејзиниот управител, тврдејќи дека при изградба на објект биле оштетени околните објекти до степен да станат опасни за живеење.

Според неговата објава, во август истата година Вишото јавно обвинителство Битола донело решение со кое постапката против пријавените била затворена. По трагичната смрт на млад човек на истиот објект, Димоски повторно го отвори прашањето за постапувањето на институциите.

— реклама —

На 15 октомври 2025 година објавил и дека пишува жалба до Вишото обвинителство во Битола против решение за отфрлање кривична пријава, при што иронично забележал дека се „самоцензурира“ и користи основни термини од страв неговите жалбени наводи да не бидат погрешно разбрани.

Димоски вечерва не тврди дека неговите претходни објави се непосредно поврзани со предметот по кој сега постапуваат ОЈО ГОКК и МВР, туку ги објави како потсетување на критиките и прашањата што претходно јавно ги упатувал кон обвинителскиот систем и ВЈО Битола.

Јавното обвинителство вечерва официјално соопшти дека обвинител од ОЈО за гонење организиран криминал и корупција обезбедил судски наредби за претрес на дом и службени простории на виш јавен обвинител во ВЈО Битола.

Според Обвинителството, постојат основи на сомнение за кривично дело „Примање награда за противзаконито влијание“ од член 359 став 3 во врска со став 2 од Кривичниот законик.

— реклама —

Претресите ги врши МВР, а Обвинителството најави повеќе детали по завршувањето на дејствијата во текот на утрешниот ден.

Засега официјално не е објавено името на осомничениот обвинител, ниту на кој конкретен предмет се однесува сомнението.