Малта со години ги одржува цените на горивото на ниско ниво, но растот на разликата меѓу регулираните и пазарните цени сè повеќе го оптоварува државниот буџет.
Според податоците на Европската комисија, просечната цена на дизелот во еврозоната минатата недела изнесувала речиси 2,3 евра за литар, а бензинот околу 2,2 евра. Во целата Европска Унија просечните цени биле околу 2,2 евра за дизел и 2,1 евро за бензин.
За разлика од тоа, на Малта дизелот од јуни 2020 година се продава по фиксна цена од 1,21 евро, а бензинот по 1,34 евро за литар. Цените останале непроменети и покрај растот на цените на нафтените деривати на светските пазари.
Разликата меѓу регулираната и пазарната цена ја покрива државата преку субвенции. Токму нивниот раст сега станува причина за загриженост.
Министерот за финансии Клајд Каруана изјавил дека во мај владата проценувала дека годишниот трошок за субвенциите ќе биде околу 30 милиони евра. До крајот на август, проценката за оваа година пораснала на околу 75 милиони евра.
Владата сега се соочува со избор дали да продолжи да ја покрива разликата од буџетот или да дозволи зголемување на малопродажните цени на горивото. Каруана нагласил дека, и покрај зголемените трошоци за енергија, државата мора да го задржи буџетскиот дефицит под три отсто.
Малта засега има релативно поволна состојба на јавните финансии. Буџетскиот дефицит минатата година изнесувал 2,2 отсто од БДП, додека јавниот долг бил 46,4 отсто од БДП.
