Рано утринава се случила силна експлозија, по која следувале уште неколку помали детонации во фабрика за огномет во областа Салина на Малта.
На социјалните мрежи беа објавени снимки од густ облак чад кој се издигнал над местото на несреќата.
Според „Тајмс оф Малта“, експлозијата се случила во фабрика за огномет во Лурд, на улицата Трик ил-Кади. Во експлозијата биле оштетени повеќе објекти во околината, но според првичните информации нема потешко повредени лица.
Двајца мажи, на возраст од 47 и 67 години, кои работеле на блиските ниви, биле пренесени во болница со полесни повреди.
Експлозијата одекнала околу 6:30 часот наутро, а столбот од чад бил видлив од повеќе делови на островот. Жители пријавиле дека го почувствувале ударниот бран и во централните и северните делови на земјата.
Not supported typeЕдвард Мерсиека, сопственик и управител на театар во близина на Магтаб, изјавил дека се разбудил по првата од трите силни експлозии.
„Се чувствував како некој со огромен чекан да удрил во ѕидот на мојата куќа. Столбот од чад беше висок стотици метри“, рекол Мерсиека.
Тој додал дека во моментот се чувствувале како да ќе бидат кренати во воздух.
Во експлозиите биле оштетени бројни згради.
Според локалните медиуми, полесно бил повреден и доставувач на храна, а оштетени се и повеќе возила.
Жителите од околината биле евакуирани бидејќи помали експлозии продолжиле да се слушаат со часови по првичната силна детонација.
