(Видео) Џамбазов: За „Преспав“ ни рекоа дека е најголемиот срам за Македонската телевизија, а серијата е Македонија во мало

„Преспав“ бил наречен „најголемиот срам за Македонската телевизија“, а имало и закани дека сценографијата ќе биде исфрлена на улица доколку не биде преземена, тврди актерот Игор Џамбазов во гостувањето во поткастот „Без рачна“. Зборувајќи за серијата, тој изрази разочарување од односот на луѓето кои, според него, одлучуваат за нејзината судбина, без да посочи конкретни имиња.

„Оние што одлучуваат, што би требало да одлучуваат за Преспав, велат дека тоа бил најголемиот срам за Македонската телевизија. И такви некои небулози“, рече Џамбазов.

Актерот смета дека проблемот е во односот кон успешните проекти создадени од други луѓе. Според него, наместо да се продолжи нешто што има вредност и публика, се брише она што не го создале актуелните носители на одлуки.

— реклама —

На прашањето дали постои можност за нова сезона и дали може да се направи притисок за продолжување на серијата, Џамбазов одговори дека таков обид веќе имало.

„Па притисокот го направивме, меѓутоа не успеа кај луѓето“, рече тој.

Разочарувањето го поврза и со влијанието на политиката врз уметноста и јавните сервиси. Според неговата оценка, кога политиката ќе навлезе во овие области, а одлуките ќе им бидат препуштени на погрешни луѓе, нема напредок.

— реклама —

Џамбазов посочи дека „Преспав“ би можел да се снима и да се емитува на друга телевизија, споменувајќи ги Канал 5 и Сител, но смета дека серијата не би ја имала истата сила како на националниот сервис.

„Во последните 30 години Македонска телевизија водеа луѓе што приватно не ме поднесуваа. Но ме ангажираа заради мојот квалитет“, изјави актерот.

Тој раскажа и дека разговорите за сценографијата добиле тон кој го изненадил и вознемирил. Според неговото сведочење, неименувано лице се заканило дека ќе ја исфрли на улица доколку екипата не ја преземе, а споменувало и тужба против „Преспав“.

„Мислам, ги слушав тие работи, не ми се веруваше и едноставно не сакам да мислам на тоа“, рече Џамбазов.

— реклама —

За него, значењето на серијата не се сведува само на хуморот. Тој оцени дека „Преспав“ урнал табуа и помогнал во надминувањето на предрасудите, а како пример ја посочи популарноста на неговите колеги Дритон и Адријан кај македонската публика. Раскажа дека при нивното гостување во Дојран биле воодушевени од вниманието и препознатливоста што им ги донела серијата.

Џамбазов го опиша „Преспав“ и како прв проект во кој се чувствувал како ѕвезда поради професионалниот однос и грижата за актерите.

Сепак, најмногу му недостасува дружбата со колегите, со кои поминале седум сезони. Иако призна дека имало и лоши епизоди и кастинг-промашувања, смета дека екипата учела од сезона во сезона и создала приказна со која растела публиката.

— реклама —

„Не ми недостасува само мене Преспав“, порача Џамбазов, сумирајќи го своето доживување на серијата со зборовите: „Преспав беше Македонија во мало“