Хуман гест на Игор Џамбазов: Наградата „Васил Иљоски“ ја донира за лекување на девојче од Куманово

На актерот Игор Џамбазов вчеравечер му беше врачена наградата „Васил Иљоски“ за високи достигнувања во театарската уметност, во областа на комедијата. Признанието му беше доделено на отворањето на 29. издание на Меѓународниот театарски фестивал „Денови на комедија“.

— реклама —

Џамбазов во своето обраќање истакна дека паричниот фонд од наградата ќе го донира за лекувањето на Јована Станковска од Куманово, која боледува од церебрална парализа.

— реклама —

За него, наградата има особено значење и поради тоа што го носи името на Васил Иљоски, кого лично го познавал.

„Дедо Васил и дедо ми Петре беа другари и починаа во само две недели разлика и некако ги загубив и двајцата. Тоа е првата работа што ми е битна“, истакна Џамбазов.

— реклама —

Тој се осврна и на своите почетоци на сцената, посочувајќи дека уште како пет-шестгодишно дете настапувал во групата деца во „Чорбаџи Теодос“.

„А веќе како дипломиран глумец го играв и Бошко во „Бегалка“ во Драмскиот театар во режија на Димитрија Рули Османли“, додаде Џамбазов.