До 13:00 часот денеска во државата се регистрирани вкупно шест пожари на отворен простор, од кои еден е сè уште активен, а пет се целосно изгаснати, информира Центарот за управување со кризи (ЦУК).
Активен останува пожарот во општина Крушево, во атарот на селото Бучин, каде гори ниска вегетација.
Во меѓувреме, изгаснати се пожарите кај селото Непроштено во општина Теарце, во атарот на селото Карбинци во општина Карбинци, каде гореле дрва, како и пожарот на депонија кај селото Ложани во општина Струга.
Локализирани и изгаснати се и пожарот кај селото Подгорци во Струшко, каде гореле ниска вегетација и жито, како и пожарот на месноста Парамкови Ниви во општина Куманово, каде била зафатена ниска вегетација.
