До 30 години ќе може да се живее во студентски дом: МОН со построги критериуми

Министерката за образование и наука Весна Јаневска најави измени на Законот за студентскиот стандард, со кои се воведуваат построги правила за сместување во студентските домови, со цел да се зголеми безбедноста и да се спречат злоупотребите.

— реклама —

Според Јаневска, една од клучните новини е воведувањето максимална старосна граница од 30 години за студентите кои аплицираат за сместување во студентските домови.

Таа посочи дека биле утврдени случаи на студенти кои со години престојувале во домовите, користејќи ги поволните услови за сместување и исхрана.

— реклама —

„Детектиравме студенти кои со години се сместуваат во домовите и законски наоѓаат начини да ги користат услугите за 3.400 денари месечно, со покриени трошоци за храна, вода, струја и друго. Затоа максималната старосна граница ќе биде 30 години“, изјави Јаневска.

— реклама —

Со законските измени се предвидува и забрана за сместување во студентски домови во траење од една до пет години за студенти кои ќе направат потешки прекршоци, како што се нарушување на куќниот ред, оштетување на инвентарот, употреба на алкохол или недозволени супстанци, насилничко однесување, вознемирување, дискриминација или други постапки со кои се загрозуваат безбедноста и достоинството на студентите и вработените.

Јаневска истакна дека паралелно со законските измени се реализираат и значајни инвестиции во студентските домови. Во тек е темелна реконструкција на домовите „Стив Наумов“ и „Кузман Јосифовски – Питу“, која треба да заврши до октомври.

Според министерката, обновените објекти ќе бидат современи и енергетски ефикасни, а новите правила ќе придонесат тие да бидат побезбедни и подобро зачувани за идните генерации студенти.