МОН отвори конкурс за студентски стипендии, пријавувањето трае до 20 ноември

Министерството за образование и наука објави конкурс за доделување 3.000 студентски стипендии за академската 2026/2027 година, со нов модел на распределба и посебна поддршка за студентите со попреченост и ретки болести.

Од вкупниот број стипендии, 1.200 се наменети за социјална поддршка, при што за првпат се издвојуваат по 50 стипендии за студенти со попреченост и за студенти со ретки болести.

— реклама —

Дополнителни 1.050 стипендии се предвидени за студенти запишани на студиски програми од стратешко значење за развојот на Македонија. Меѓу нив се математиката, физиката, хемијата, земјоделството, шумарството, наставната биологија и рударството, согласно одлуката на Националниот совет за високо образование и научноистражувачка дејност од 3 ноември 2026 година.

— реклама —

Останатите 750 стипендии се наменети за студенти со висок академски успех, кои имаат просечна оценка од најмалку 8,50 и редовно ги исполнуваат студиските обврски.

Месечниот износ на стипендиите за студентите од стратешките области изнесува 18.000 денари, додека оние што ќе добијат стипендија за социјална поддршка или за висок академски успех ќе добиваат по 6.050 денари. Средствата ќе се исплаќаат во текот на девет месеци од студиската година.

— реклама —

Од МОН посочуваат дека со изменетиот модел се настојува да се обезбедат поеднакви можности за образование и академски развој, но и да се поттикне интересот за професии за кои на државата ѝ е потребен стручен кадар.

— реклама —

Пријавувањето е исклучиво електронско, преку порталот e-uslugi.mon.gov.mk, а конкурсот е отворен од 6 до 20 ноември 2026 година.

Во тек е и пријавувањето за 15 стипендии за студенти во прва година на студиски програми по македонски јазик, како и конкурсот за поврат на средства за купен музички инструмент за академската 2026/2027 година.