Програмата за сеопфатно сексуално образование повторно е воведена, но под името – „Здравје и заштита на здравјето“.

Наставната програма за сеопфатно сексуално образование е повторно воведена под името „Здравје и заштита на здравјето“, но со изменета терминологија, поради што Институтот за родови студии при УКИМ предупредува на сериозни научни, педагошки и правни недоследности.

— реклама —

Новата програма е донесена на 7 октомври, откако претходната верзија беше повлечена во септември по реакциите во јавноста. Иако се задржани бројот на часови и најголем дел од тематските содржини, од документот се отстранети поимот „род“, термините поврзани со него, како и зборот „контрацепција“.

Од Институтот сметаат дека не станува збор само за промена на терминологијата, туку за суштински пропуст што може да го отежне разбирањето на родовата нееднаквост, дискриминацијата и родово заснованото насилство. Според нив, учениците ќе учат за стереотипите, нееднаквиот третман и насилството, но без да го изучуваат поимот што научно ги објаснува овие појави.

— реклама —

Оттаму посочуваат дека „род“ е научен и правен поим, присутен во македонското законодавство и во Истанбулската конвенција, која државата ја ратификувала. Неговото изоставување, според Институтот, создава несовпаѓање меѓу наставната програма, современите научни сознанија и законската терминологија.

— реклама —

Претходната програма беше повлечена по отвореното писмо на епископот Јаков Стобиски до министерката за образование Весна Јаневска, во кое ја обвини дека со воведувањето на сеопфатното сексуално образование поддржува таканаречена „родова идеологија“. Јаневска тогаш најави темелна ревизија, иако претходно изјави дека лично не гледа ништо спорно во содржината на програмата.

Од Министерството за образование тврдат дека измените се направени по разгледување на јавните и стручните забелешки, меѓу кои и забелешките на Комората на психолози, а не како резултат на притисок од верска заедница.

— реклама —

Институтот за родови студии бара поимот „род“ повторно да биде вклучен и јасно објаснет во програмата пред нејзината примена. Според нив, наставните содржини треба да се засноваат на научни сознанија и законски обврски, а не на јавните полемики околу одделни термини.