До Нова година ќе биде пуштена клучката кај Момин Поток, најави Ѓорѓиевски

Изградбата на клучката кај Момин Поток е реализирана околу 75 проценти и се очекува целиот проект да биде завршен до Нова година, со што значително ќе се подобри сообраќајната поврзаност и ќе се намали метежот во овој дел од Скопје, изјави градоначалникот Орце Ѓорѓиевски при увидот на градежните активности, заедно со премиерот Христијан Мицкоски.

— реклама —

Според Ѓорѓиевски, кога ја презел функцијата, проектот бил речиси целосно блокиран, а експропријацијата била реализирана само околу 10 проценти. Денес, како што рече, тој процес е целосно завршен и сите сопственици се обештетени.

— реклама —

„Проектот напредува според планираната динамика. Станува збор за сложен инфраструктурен зафат што опфаќа изградба на два километри потпорни ѕидови, нови пешачки и велосипедски патеки, како и пет мостови, од кои дел веќе се во завршна фаза“, истакна Ѓорѓиевски.

Тој најави дека до крајот на годината ќе бидат завршени и проширувањето на мостот на реката Серава, како и мостот на булеварот „Љубљанска“.

— реклама —

Воедно, информираше дека продолжуваат активностите и на реконструкцијата на булеварот „Борис Трајковски“, додека во август треба да започне изградбата на новиот мост што ќе ги поврзе општините Гази Баба и Аеродром.

Ѓорѓиевски нагласи дека Владата обезбедила финансиска поддршка од 60 милиони денари за реализација на клучката кај Момин Поток, оценувајќи дека станува збор за еден од најзначајните инфраструктурни проекти што ќе придонесе за побезбеден и поефикасен сообраќај во главниот град.