Над 400 оброци поделени за најранливите сограѓани по повод Светскиот ден на борба против сиромаштијата

Градоначалникот на Скопје, Орце Ѓорѓиевски, по повод Светскиот ден на борба против сиромаштијата, заедно со претседателот на здружението „Љубезност“, Тони Станковски, подели повеќе од 400 оброци за граѓани на кои им е потребна поддршка.

Во рамки на хуманитарната акција, тие се приклучиле и на штандот на отец Оливер, а храна била доставена и до пунктовите на хуманитарната организација „Св. Спас“.

— реклама —

Ѓорѓиевски истакна дека солидарноста и грижата за луѓето се вредности што треба да се негуваат секојдневно, особено кога станува збор за граѓаните кои се соочуваат со тешки животни предизвици.

— реклама —

Тој упати благодарност до Тони Станковски, отец Оливер, волонтерите од „Љубезност“ и „Св. Спас“, како и до сите што вложуваат време, труд и љубов за да им помогнат на сограѓаните.

Градоначалникот порача дека ќе продолжи да ги поддржува иницијативите што обезбедуваат конкретна помош и да работи на создавање град во кој грижата за секој човек ќе биде секојдневна обврска.

— реклама —

„Никој не смее да биде сам кога му е најтешко. Вистинската големина на еден град се гледа во грижата што ја покажува кон своите луѓе. Прво човек, потоа градоначалник!“, порача Ѓорѓиевски.