Ѓорѓиевски: Иднината на младите се гради со можности, поддршка и доверба

Младите треба да имаат активна улога во носењето одлуки и креирањето политики што директно влијаат врз нивниот живот, порача градоначалникот на Скопје и претседател на ЗЕЛС, Орце Ѓорѓиевски, на регионалниот форум во Скопје посветен на локалното лидерство за млади, мир и безбедност.

На форумот учествуваа и министерот за социјална политика, демографија и млади, Ѓоко Велковски, постојаниот претставник на УНДП, Армен Григорјан, постојаната координаторка на ОН, Рита Колумбија, директорот на НАЛАС, Келменд Заза, како и градоначалници и претставници на локалните власти од земјата и регионот.

— реклама —

Ѓорѓиевски истакна дека општините имаат важна улога во градењето доверба во институциите и создавањето средина во која младите ќе се чувствуваат прифатени и ќе имаат еднакви можности. Тој ја нагласи потребата од активни младински совети, достапни младински центри и службеници за млади кои ќе ја поврзуваат младата популација со локалните власти.

Посебно внимание, според него, треба да им се посвети на младите кои се соочуваат со сиромаштија, исклученост и нееднакви можности.

— реклама —

На форумот била истакната и важноста на соработката меѓу ЗЕЛС, Министерството за социјална политика, демографија и млади и Националниот младински совет на Македонија. Преку Мрежата на службеници за млади, размената на искуства и јакнењето на капацитетите, целта е младинските иницијативи полесно да стигнуваат до институциите и да се претвораат во конкретни активности.

— реклама —

Ѓорѓиевски им честиташе на петте наградени општини од регионот, чии практики покажуваат како учеството на младите придонесува за помирни, побезбедни и посолидарни заедници. Тој упати благодарност до УНДП, НАЛАС и сите партнери за поддршката и соработката.

„Младите заслужуваат да знаат дека тука има место за нивните идеи, труд и амбиции“, порача Ѓорѓиевски.