ВМРО-ДПМНЕ преку соопштение велат дека економските политики на Владата даваат резултати, наведувајќи дека пазарот се стабилизира, инфлацијата се намалува, а цените на храната бележат пад.
Според партијата, владините мерки за намалување на цените на нафтените деривати придонеле Македонија да има едни од најниските цени на енергенсите, што, како што наведуваат, влијаело и врз намалувањето на цените на прехранбените производи.
Повикувајќи се на податоците на Државниот завод за статистика, ВМРО-ДПМНЕ истакнува дека годишната инфлација во јуни изнесувала 3,4 проценти, додека во споредба со мај трошоците за живот се намалиле за 0,5 проценти, а индексот на цените на мало за 0,8 проценти.
Од партијата посочуваат дека инфлацијата кај храната и безалкохолните пијалаци изнесувала 2,5 проценти, а кај облеката и обувките 2,1 процент. Според нив, најголемо влијание врз годишната инфлација имале алкохолните пијалаци и тутунот, со раст од 9,3 проценти, како и транспортот со 6,2 проценти.
ВМРО-ДПМНЕ оценува дека овие показатели значат дека основните прехранбени производи станале подостапни за граѓаните.
Во соопштението се прави и споредба со земјите од регионот, при што се наведува дека инфлацијата во Грција изнесува 3,9 проценти, во Бугарија 5,6 проценти, во Хрватска 4,5 проценти, во Словенија 3,6 проценти, а во Турција 32,11 проценти.
Партијата ја споредува и актуелната инфлација со онаа во јуни 2022 година, кога, според нив, изнесувала 14,5 проценти, оценувајќи дека сегашните економски политики покажуваат значително подобри резултати во справувањето со инфлацијата и последиците од енергетските кризи.
