Левица преку соопштение ја обвини ВМРО-ДПМНЕ за политичка одговорност во случајот со четирите таканаречени „Хашки случаи“, потсетувајќи на собраниското гласање од 2011 година со кое, според партијата, било овозможено предметите да не добијат судски епилог.
Од Левица велат дека по вчерашната пресуда на Специјализираните совети во Хаг против поранешниот врв на ОВК повторно се отвора прашањето за постапувањето на македонските институции со предметите што Хашкиот трибунал ги вратил на домашното правосудство.
Партијата посочува дека на 19 јули 2011 година, со 63 гласа „за“, Собранието усвоило автентично толкување на Законот за амнестија, со кое амнестијата била проширена и врз четирите предмети – „Водство на ОНА“, „Мавровски работници“, „Липковска брана“ и „Непроштено“.
Според Левица, тогашното парламентарно мнозинство предводено од ДПМНЕ и ДУИ создало правна пречка за натамошно гонење, наместо одговорноста да ја утврдуваат правосудните органи.
Во соопштението се наведува и дека Комитетот на Обединетите нации против тортура подоцна констатирал дека автентичното толкување од 2011 година обезбедило неказнивост за лица обвинети за повреди на човековите права поврзани со конфликтот, при што биле наведени и четирите Хашки случаи. Комитетот, според Левица, побарал нивно преиспитување и усогласување со Конвенцијата и меѓународното право.
Од партијата оценуваат дека собраниското гласање од 19 јули 2011 година е важен дел од политичкото наследство на ДПМНЕ и тврдат дека денешната реторика на партијата не може да ги избрише правните последици од тогашната одлука.
Левица заклучува дека прашањата поврзани со сомнежите за воени злосторства, тортура, киднапирања и убиства требало да бидат предмет на судско утврдување, а не на политички договори.
