СДСМ преку соопштение реагира дека во услови на епидемија од западнонилска треска, во Драчево, каде што е прогласена епидемија, се организира кино на отворено.
Од партијата наведуваат дека досега се потврдени 35 случаи на западнонилска треска, има три починати лица, а шест пациенти се во критична состојба и се лекуваат на интензивна нега.
СДСМ ја обвинува Владата за, како што наведуваат, несоодветно справување со епидемијата и задоцнета реакција во превенцијата од ширењето на инфекцијата.
Од опозициската партија велат дека наместо навремена превенција, систематско прскање против комарци, поставување стапици и отстранување на местата погодни за нивно размножување, институциите реагираат откако веќе има заболени и починати.
„Во Скопје долго се чека за прскање против комарци. Само од најавата за прскањето поминаа шест дена, и тоа сега, во време на епидемија“, стои во реакцијата на СДСМ.
Партијата го критикува и одржувањето на настани на отворено во епидемиско подрачје, оценувајќи дека тоа е показател за несериозен пристап кон здравствената криза.
СДСМ упатува критики и кон министерот за здравство Сашо Клековски и премиерот Христијан Мицкоски, обвинувајќи ги за „аматеризам и непрофесионализам“ во справувањето со епидемијата.
Од партијата велат дека состојбата, според нив, покажува „колапс на институциите“ и недостаток на навремена и организирана реакција, додавајќи дека граѓаните ги чувствуваат последиците по своето здравје.
