СДСМ преку соопштение предупредува дека состојбата во сточарството дополнително се влошува, оценувајќи дека домашните производители на млеко се соочуваат со намалени откупни цени, неизвесен пласман и доцнење на субвенциите.
Од партијата обвинуваат дека Владата и министерот за земјоделство Цветан Трипуновски не преземаат мерки за надминување на кризата, додека, како што велат, товарот повторно паѓа врз грбот на сточарите.
„Се намалува откупната цена на млекото во време кога цените на млекото и млечните производи во маркетите растат. Тоа значи дека некој остварува големи профити на сметка на македонските сточари“, наведуваат од СДСМ.
Според партијата, дополнителна загриженост предизвикува фактот што две млекарници во делчевскиот регион најавиле прекин на откупот на млеко, поради што голем број производители би можеле да останат без пласман за своето производство и без сигурен извор на приходи.
СДСМ обвинува и дека две недели не се објавуваат имињата на компаниите чии млечни и месни производи, според претходно објавени информации, отстапувале од декларираните состојки.
Од опозициската партија бараат итна реакција од надлежните институции за обезбедување непречен откуп на млекото и воведување посебна мерка преку интервентната програма за поддршка на производителите на кравјо млеко, со цел да се ублажат последиците од кризата.
