Милорад Додик оцени дека одлуката на црногорските власти да им забранат влез на одредени српски државјани е „неочекувана, непотребна и лоша“, наведувајќи дека Подгорица со тој потег „апсолутно погрешила“.
Во објава на социјалната мрежа Икс, Додик порача дека има разбирање доколку Србија презела реципрочни мерки, додавајќи дека, според него, „иживувањето врз Србија во регионот мора да престане“.
Тој оцени дека одлуката на црногорските власти е политички некоректна и непријателски насочена кон граѓаните на Србија и истакна дека не гледа оправдување за таквиот потег.
„Дали некому му се допаѓаат или не, тоа е друго прашање. Ако претходно биле на листа на лица на кои им бил забранет влез, можам да разберам зошто биле депортирани. Но, во услови кога тоа не постои, ова е доказ за политички некоректен и непријателски однос кој упорно се промовира без никаква причина и потреба“, напиша Додик.
Тој додаде дека не очекувал вакви потези од црногорската страна, но нагласи дека Србија „мора да се брани“ и дека тој стои на страната на Белград.
„Граѓаните на Црна Гора мора да разберат дека ако нивните власти спречуваат некого да влезе во земјата, тогаш мора да бидат преземени реципрочни мерки“, порача Додик.
