Додека Европа се соочува со нов бран екстремни горештини и рекордно високи температури, научниците објаснуваат зошто жените честопати потешко ги поднесуваат жештините отколку мажите.
Британскиот лекар Амир Кан објасни дека не станува збор само за субјективно чувство, туку дека постојат биолошки причини поради кои жените поинтензивно ја чувствуваат жештината.
„Жените не претеруваат. Тие ги изнесуваат фактите, а причината за тоа е навистина фасцинантна“, изјави Кан во видео објавено на социјалната мрежа Тик-ток.
Според него, хормоните играат клучна улога во регулирањето на телесната температура. Естрогенот и прогестеронот влијаат врз начинот на кој телото се лади, а менопаузата и топлите бранови дополнително можат да ја влошат состојбата.
Лекарот посочува и на разликите во телесната градба. Жените вообичаено имаат помала телесна маса и помал волумен на крв од мажите, што значи дека организмот располага со помалку крв за пренесување на топлината од внатрешноста на телото кон кожата, каде што таа се ослободува.
Покрај тоа, жените во просек имаат помало срце и потесни крвни садови, поради што циркулацијата и ослободувањето на вишокот топлина може да бидат помалку ефикасни.
Истражувањата покажуваат и дека жените често имаат повисока температура на кожата, но пониска внатрешна телесна температура во споредба со мажите. Поради тоа, тие можат да чувствуваат дека им е многу топло дури и кога телото реално не е прегреано.
Дополнителен фактор е и дехидратацијата. Поради помалата телесна маса, загубата на течности преку потење има поголемо влијание врз жените. Недостатокот на железо, кој е почест кај жените поради менструалниот циклус, исто така може да предизвика исцрпеност, вртоглавица и замор за време на топлите денови.
Експертите препорачуваат во периоди на екстремни горештини да се избегнува престој на сонце во најтоплиот дел од денот, да се носи лесна и светла облека, редовно да се внесуваат течности и да се ограничат физичките активности на утринските или вечерните часови.
