Економијата на Европската унија трпи значителни загуби поради војната на Блискиот Исток, кои се проценуваат на околу 500 милиони евра дневно, изјави европскиот комесар за економија Валдис Домбровскис.
Според неговите оценки, конфликтот предизвикал пад на економската активност во ЕУ меѓу 0,2 и 0,6 проценти, како резултат на растот на цените на енергенсите и нарушените синџири на снабдување. Посебно е истакнато дека цената на природниот гас се зголемила за околу 60 проценти, додека значително пораснале и трошоците за авионско гориво.
Дополнителен удар врз европската економија претставуваат нарушувањата во глобалната трговија, поврзани со ограничувањата во Ормутскиот теснец, клучен поморски коридор за транспорт на енергенси. Поради овие околности, европските компании се соочуваат со доцнења, поскапи превози и намалена сигурност во снабдувањето.
Овие развои, според проценките, ја зголемуваат неизвесноста на пазарите и создаваат дополнителен притисок врз економскиот раст во Унијата, која веќе се соочува со предизвици во закрепнувањето.
